1 Thessalonians 5
Nuim Ei Yant Omba Ei nga Tᵾk Kun Etᵾk Muⱡᵾi!
1 Angmᵾn, uⱡ mbᵾ, rumbᵾⱡ, muna ant mong, nant ila ekit omba ei? Tᵾn ndi, enim wang ndupᵾn mon ti, ropᵾn ngui ngᵾngmin. 2Ei kᵾn, en enim pilik pora ndurmin ni, Nuim ei nga omba, ant mong ei, kindᵾp wamp na ti, rumbuldi orum ni mel omba. 3Wamp mbᵾ ndi, nᵾk mel, “Tᵾn akup moⱡᵾp, kai mondunmᵾn, rui nᵾring,” nᵾk muⱡangina. Amp kangambuⱡa ming pilik, kangambuⱡa mbuⱡ rorum ei mel, uⱡ min ngᵾn pi mbᵾ, ekit om ei kᵾn, mo rok ping mel, kapⱡa mon! 4Wote, enim angmᵾn kᵾⱡ, rumbᵾⱡ ila muⱡi nambᵾrmᵾn ei nga, min ngᵾn pimbᵾ ekit omba ui ei, kindᵾp wamp na ni mel, enim tᵾpa tᵾndpa ui nᵾwangga mon! 5Enim rᵾⱡang ila mormin wamp mbᵾ, enim kona ant ei nga wamp mbᵾ mormin. Tᵾn kona rumbᵾⱡ ei nga wamp kat mon! 6Ei kᵾn, tᵾn wamp mat etmin ei mel, ur pi napᵾpᵾn, mong raⱡ makilpᵾn, numan kundil nangga muⱡmᵾn. 7Kona rumbᵾⱡ rorum ei kᵾn, wamp ur petmin. Wote, rumbᵾⱡ ila ku, nu kit nok, kekilip rok etmin. 8Wote, tᵾn wamp ei, rᵾⱡang ila mormin, ei nga tᵾn nga numan ei piral nangga, muⱡmᵾn. Wote tᵾn nga mondpa pili uⱡ ei kᵾn, wamp numan ngui uⱡ raⱡ tᵾpᵾn, kumba ripa mel rapᵾpᵾn, wote tᵾn, Got ndi, yant omba etpa tᵾmba uⱡ ei, ronduⱡ mundpᵾn pilmin ei tᵾpᵾn, peng wᵾna kapa mel pakpᵾn muⱡmin. 9Got ndi, elim nga popᵾⱡ ent tᵾn nangga nimba, mbi ropa ti nᵾtᵾtᵾm, mon! Tᵾn, Got nga wamp etpa ti uⱡ ei, Nuim Jisas Kraist kᵾn kandᵾp tᵾmin nimba, tᵾn mbi ropa titim. 10Wu ei, tᵾn nga nindpa kurum uⱡ puⱡ ei, tᵾn wamp kont mormᵾn mbᵾ kep, wamp kui mbᵾ kep, elim tᵾnggᵾt yant om ei kᵾn, rak ndupᵾn muⱡmin nimba itim. 11Ei nga, akup etᵾk mormin uⱡ mbᵾ mel, wamp ti ndi, ti etᵾk, ronduⱡ mundᵾk, tᵾk rapᵾndᵾk itᵾi!Man Ik Kai Mat
12 Angmᵾn, tᵾn ndi, enim ik ti waldᵾp nᵾnmᵾn ei, enim wamp mormin ruk ting ila, wamp mat kongun ronduⱡ mundᵾk enmin mbᵾ, tᵾk ou ndᵾi. Wamp mbᵾ, Nuim ei ndi, mbi ropa tᵾpa, enim kᵾn ronduⱡ mondᵾk, ik mbo indeing nimba, tᵾpa mundrum. 13Wamp mbᵾ, enim nga nᵾk, kongun etmin ei nga tᵾk ou nduk, numan nguk itᵾi! Wamp mbᵾ kᵾn pora, min kan uⱡ mbᵾ etᵾk muⱡᵾi! 14Angmᵾn, tᵾn ndi, enim kᵾn ik ronduⱡ mundᵾp nᵾnmᵾn ei, enim ndi, enimp mondung wamp mbᵾ, nᵾk kun mundᵾk, mundmong eng wamp mbᵾ, etᵾk ronduⱡ mundᵾk, wening em wamp mbᵾ, tᵾk rapᵾndᵾk, wamp mbᵾ kᵾn pora, raka nᵾk muⱡᵾi! 15Wamp ti ndi, ti etpa kit mondum ndam, ⱡang etᵾk ti nᵾtᵾi! Rᵾk rᵾk ronduⱡ mundᵾk, wamp mbᵾ kᵾn pora, uⱡ kai mbᵾ mint itᵾi!16Rᵾk rᵾk numan kai piyangga molk, atinga rᵾk rᵾk rok, uⱡ kit kai raⱡ elpa elpa om mbila, Got kᵾn angge nᵾk tᵾi! Got ndi, Jisas Kraist nga mbi ila, uⱡ mbᵾ mel iteing nimba pᵾtᵾm. 19Muⱡnga Wingti nga ndip ei, rok kumᵾndi nᵾmᵾndᵾi! Got nga ik mong ronduⱡ mbᵾ, pai nok nᵾk ngung ndam, tᵾk mbuⱡ ngui ngᵾngᵾi! 21Uⱡ kᵾⱡ pora kandkᵾn, pilkᵾn mbi ndukᵾn, wote uⱡ kai mbᵾ, ambulk gi ndᵾi! 22Wote, uⱡ kit mbila, runga etᵾk muⱡᵾi!
23Got ndi, tᵾn moⱡᵾp kundmin nimba uⱡ kai mbᵾ, mok ropa ngorum. Wu ei ndi, enim nga min kᵾng raⱡ kᵾn, muⱡnga ei kᵾn, etpa wingti rundangga! Jisas Kraist yant om ei kᵾn, enim kᵾn nit ti, muⱡi nᵾmbᵾⱡangga! 24Enim wi ropa titim wu ei ndi, uⱡ mbᵾ mel endᵾmba. Ei nambuⱡ emel, wu ei wu kun kai ei.
25Angmᵾn, tᵾn nga nᵾndᵾk atinga rundᵾi! 26Got nga manga rapa tenda wamp mbᵾ kᵾn, numan kai pendᵾk ki tᵾi! 27Na Nuim ei nga mbi ila, ik ronduⱡ mundᵾp nᵾnt ei, wamp mbᵾ pora, kᵾmp rok ngᵾi! 28Nuim Jisas Kraist nga wamp poⱡ ti uⱡ ei, enim kᵾn kan piyangga!
Copyright information for
MED